Роварны рэйд памяці генерала

Беларускае Радыё РАЦЫЯ - ЗАМЕЖЖА - Роварны рэйд памяці генерала (фота)

Роварны рэйд памяці генэрала Станіслава Булак-Балаховіча

Беларуская Нацыянальная Памяць ужо чацьверты год запар арганізуе роварны рэйд памяці, які пройдзе па варшаўскіх месцах, зьвязаных зь імем генэрала.

Пачнецца а 12 гадзіне 19 траўня ад помніка Дэ Голя, далей праз мост Панятоўскага на правы бераг Віслы - на вуліцу Парыжскую 27, месца сьмерці Булак-Балаховіча. Далейшы шлях павядзе на вайсковыя могілкі на Павонзках, месца сымбалічнага пахаваньня генэрала.

Запрашаем!

11 траўня ў суботу а 12 гадзіне ад Замкавай плошчы (Placu Zamkowego) ў Варшаве рушыць традыцыйны Парад Шумана.

Беларусь - эўрапейская краіна! Выйдзем на Парад з нашымі сьцягамі!

Гуртуемся вакол бел-чырвона-белага штандару, які вярнуўся з Чэмпіянату сьвету па хакею ў Стакгольме!

Беларусы ў Варшаве ўсклалі кветкі на могілкі чырвонаармейцаў

Крыніца: Euroradio

8 траўня, у дзень заканчэння вайны ў Еўропе, сябры “Беларускай Нацыянальнай Памяці” наведалі ў польскай сталіцы cавецкія вайсковыя могілкі на вуліцы Жвіркі і Вігуры.

Там пахаваныя  21 468 чырвонаармейцаў Першага беларускага фронту, якія загінулі ў баях за Варшаву ў 1944-1945 гадах.

Актывісты пад нацыянальнымі сцягамі ўсклалі бел-чырвона-белыя кветкі на магілы беларусаў.

Бел-чырвона-белыя сьцягі на чэмпіянаце свету па хакеі

Вадзім Батура, Беларускае Радыё Рацыя

Пад час стартавага матчу Беларусь - Чэхія былі разгорнуты некалькі сьцягоў. Адзін быў вялізны, а таксама была і харугва з выявай герба "Пагоня", што не спадабалася арганізатарам. Яны выклікалі паліцыю.

Паводле Швэдскіх хакейных функцыянераў, тлумачыць старшыня “Беларускай нацыянальнай памяці” Анатоль Міхнавец, сьцягі зьяўляюцца палітычнай сымболікай і ня могуць выкарыстоўвацца. Калі паліцыя паспрабавала згарнуць бел-чырвона-белыя сьцягі, на абарону беларусаў сталі швэдскія заўзятары. У выніку беларускія сцьягі змаглі правісець на трыбунах да канца матчу. Аднак арганізатары заявілі, што больш беларусаў з нацыянальнымі сьцягамі на трыбуны ня пусцяць.

Матч зборная Беларусі прайграла 0:2. Наступны яна правядзе у нядзелю, 5 траўня, з камандай Славеніі.

БНП едзе падтрымаць беларускіх спартоўцаў

Заўтра першая гульня нацыянальнай зборнай Беларусі на Чампіянаце свету па хакею. Усе матчы групавой стадыі беларусы правядуць у Стакгольме.

3 траўня ў стартавым матчы на турніры беларусы згуляюць з чэхамі, 5 траўня — са славенцамі, 6 траўня — са шведамі, 10 траўня — з канадцамі, 11 траўня — з нарвежцамі, 13 траўня — з датчанамі, 14 траўня — са швайцарцамі.

Беларуская Нацыянальная Памяць будзе падтрымоўваць нашых спартоўцаў на трыбунах і запрашае беларусаў Швецыі і ўсіх хто мае магчымасць далучацца.