May 14, 2012

Велапрабег памяці Булак-Балаховіча адбыўся ў Варшаве

Крыніца: Эўрарадыё

13 траўня ў польскай сталіцы прайшоў роварны рэйд памяці па месцах, звязаных з імем легендарнага генерала.

Удзельнікі акцыі з прымацаванымі да ровараў бел-чырвона-белымі сцягамі праехалі ад цэнтру Варшавы да вуліцы Парыскай, дзе 10 траўня 1940 году загінуў Булак-Балаховіч. Мяркуецца, што забіты ён быў агентамі гестапа. На тым месцы знаходзіцца мемарыяльная шыльда ў гонар генерала, каля якой удзельнікі акцыі паставілі белыя і чырвоныя знічы.

Потым праз увесь горад калонна накіравалася на могілкі "Павонзкі", дзе знаходзіцца сімвалічная магіла Булак-Балаховіча, бо ягонага цела так і не знайшлі. Каля яе ўдзельнікі акцыі таксама запалілі знічы і ўсклалі кветкі.

Ініцыятарам мерапрыемства выступіла "Беларуская Нацыянальная Памяць". Арганізацыя  ўжо трэці год запар арганізуе роварны рэйд памяці па варшаўскіх месцах, звязаных з імем легендарнага палкаводца.

Нагадаем, што Булак-Балаховіч у Першую сусветную вайну камандаваў дыверсійным аддзелам царскага войска. Пасля служыў у Чырвонай Арміі, сышоў з яе і ваяваў супраць бальшавікоў у Эстоніі. Пазней перайшоў пад камандаванне Ураду БНР. 

У лістападзе 1920 года Булак-Балаховіч абвясціў у Мазыры "незалежную беларускую дзяржаву", але неўзабаве яго армія была разбітая Чырвонай Арміяй і адышла ў Польшчу.

May 11, 2012

5 гадоў БНП!


May 2, 2012

Бел-чырвона-белы сцяг праплыў над Бугам


Крыніца

“Беларуская Нацыянальная Памяць” правяла водную экспедыцыю па Беласточчыне.  Маторная лодка пад бел-чырвона-белым сцягам прайшла некалькі дзесяткаў кіламетраў па рацэ Буг. Мэтай экспедыцыі была падрыхтоўка да ўсталявання памятнага крыжа ў гонар ваяроў Вялікага Княства Літоўскага. Памятны крыж паўстане на месцы бою аддзела Якуба Ясінскага з войскамі Суворава ў 1794 годзе.

Як адзначыў кіраўнік “Беларускай Нацыянальнай Памяці” Анатоль Міхнавец, беларуская Беласточчына мае багатую гісторыю і нажаль яна малавядомая.

Міхнавец: “Мэтай БНП з’яўляецца даследаванне беларускай гісторыі, культуры і традыцыі. Веды даюць сілы і паказваюць шляхі. Нам ёсць чым ганарыцца і пра гэта кажа наша гісторыя, трэба толькі ёй цікавіцца”.

Адзначым, што  “Беларуская Нацыянальная Памяць”  не першы раз спалучае гісторыю і спорт. На працягу апошніх пяці гадоў адбываліся лыжныя рэйды, роварныя прабегі і экспедыцыі на самаходах.